សម្តេចតេជោ ប្រតិកម្មនឹងអ្នកលេងFacebook ដែលផ្សព្វផ្សាយថា សម្តេចដាច់សរសៃឈាមខួរក្បាល
08-August-2016 | ដោយ មែន កំសត់
ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានប្រតិកម្មខ្លាំងទៅកាន់អ្នកលេង ហ្វេសប៊ុក(Facebook )ដែលបានផ្សព្វផ្សាយបំភ្លៃថា សម្តេចតេជោដាច់សរសៃឈាមខួរក្បាល ដោយសម្តេចចាត់ទុកថា ការផ្សព្វផ្សាយបែបនេះ ជាការប្រមាថធ្ងន់ធ្ងរដែលមិនអាចទទួលយកបាន។
ប្រតិកម្មរបស់ សម្តេចតេជោ ហ៊ុន សែន បានធ្វើឡើង នៅក្នុងពិធីតភ្ជាប់ស្ពានកោះធំ ខេត្តកណ្តាល នាព្រឹកថ្ងៃទី០៨ ខែសីហា ឆ្នាំ២០១៦នេះ បន្ទាប់ពីអ្នកលេងហ្វេសប៊ុកម្នាក់ បានផលិតវីដេអូមួយដោយរាយការណ៍ថា សម្តេចតេជោ ហ៊ុន សែន បានដាច់សរសៃឈាមខួរក្បាលនៅផ្ទះក្បែរវិមានឯករាជ្យ ហើយត្រូវបានបញ្ជូនទៅមន្ទីរពេទ្យសិង្ហបុរី ហើយតាំងខ្លួនជាអ្នករាយការណ៍ដូចជា អ្នកព័ត៌មានអាជីព។
ចំពោះការការលើកឡើងនេះ សម្តេចតេជោ ហ៊ុន សែន បានថ្លែងតបដោយសម្ដីខ្លាំងៗថា “...សុំផ្តាំទៅវិញទៅក្មួយ នេះជាអំពើបាប ជាការប្រមាថ សូមក្មួយយកចិត្តទុកដាក់អំពីសុខភាពខ្លួនឯង យកចិត្តទុកដាក់អំពីសុខភាពម្តាយ ជីដូនជីតខ្លួនឯងទៅ គ្រប់គ្រាន់ហើយមិនបាច់យកចិត្តទុកដាក់ដល់ថ្នាក់ហ្នឹងពេក អំពីសុខទុក្ខនាយករដ្ឋមន្ត្រី ហ៊ុន សែន នោះទេ...”។
សម្តេចតេជោ ហ៊ុន សែន បានបញ្ជាក់ថា រហូតដល់ពេលនេះ សម្តេចមានសុខភាពរឹងមាំ ដែលអាចបើកយុទ្ធនាការចុះសួរសុខទុកប្រជាពលរដ្ឋ និងមន្ត្រីតាមខេត្តនានាបាន មិនតែប៉ុណ្ណោះ សម្តេចថែមទាំងអាចរាំញីកែងជើងបានទៀត។
សម្តេចថា រឿងដាច់សរសៃឈាមខួរក្បាលនេះ សម្តេចមិនមានពូជដៃសរសៃឈាមខួរក្បាលនោះទេ ហើយក៏មិនមានពូជឡប់នោះដែរ។សម្តេចតេជោ បានមានប្រសាសន៍យ៉ាងដូច្នេះថា “...ខ្ញុំគ្មានពូជដាច់សរសៃឈាមខួរក្បាលទេ ហើយអាពូជឡប់នេះ ក៏អត់មានដែរបើសិនជាអស់លោកឡប់ ក៏ឡប់គ្នាឯងចុះ កុំនាំខ្ញុំឡប់ ហើយកុំបំភ័យប្រជាពលរដ្ឋ...”៕
ចំនួនអ្នកទស្សនា
- ថ្ងៃនេះ1361
- ម្សិលមិញ4911
- សប្តាហ៍នេះ18931
- ខែនេះ1361
- ឆ្នាំនេះ244601
- សរុប20687057